Hannibal TV Series
සුපුරුදු විදිහට තවත් සුපිරි කතා මාලාවක් අරගෙන ඔන්න අදත් මම ඔයාලව හම්බවෙන්න ආව. මේකත් අපේ කොල්ලො අතර බොහොම ජනප්‍රිය වුනු කතා මාලාවක් තමයි. මේ කතා මාලාව විකාශනය ආරම්භ කලේ 2013 වසරේදීයි. IMDB Rating වල 8.5 ක ඉහල අගයක් හිමි කරගෙන තියෙන මේ කතා මාලාව Crime, Drama, Horror කියන වර්ගයන් යටතට ගැනිය හැකියි.
එහෙනම් ඉතිං අපි කතාවෙ පසුබිම ගැනත් දැනගමුකො. ඇත්තටම මේ කතා මාලාව ගලාගෙන යන්නෙ එක දිගට සිදු වෙන මිනිමැරුම් මාලාවක් පිලිබද පරීක්ෂණ පවත්වන කණ්ඩායමක් වටායි. මේ කණ්ඩායමේ ප්‍රධානියා වන්නේ ජැක් ක්‍රව්ෆෝඩ් කියන්නේ FBI නිලධාරියෙක්. මේ පරීක්ෂණයට ඔහුට උදවු කරන්නෙ විල් ග්‍රැහැම් කියන මනෝ විද්‍යා මහාචාර්‍ය වරයායි. එතකොට දොස්තර හැනිබල් ලෙක්ටර් කියන්නෙ ඉතාමත් දක්ෂ නමුත් අමුතු ගති පැවතුම් තියෙන මනෝ වෛද්‍ය වරයෙක්. ජැක්ට උදවු කරන අනෙක් පුද්ගලයා ඔහුයි.
මේ සිදුවෙන මිනීමැරුම් මාලාව ඉතාමත් අස්වාභාවික විදියට සිදුවෙන මිනීමැරුම් මාලාවක්. නමුත් සෑම මිනීමැරුමක්ම එකම ආකාරයකින් තමයි සිදු වෙන්නෙ. මේ මිනී මැරුම් වලට ගොදුරු වන සෑම කෙනෙක්ම තරුණ ගැහැණු ලමුන් වීම තවත් විශේෂ සිදු වීමක්. ඒ වගේම මේ සෑම ගැහැණු ලමයෙකුගෙම ශරීර අවයව අතුරුදහන් වීමක් හෝ එසේත් නැතිනම් මාරු කිරීමක් වැනි දෙයක් මිනීමරුවා විසින් සිදු කරනවා. මොවුන් පරීක්ෂණ පවත්වන්නට පටන් ගැනීමෙන් පසුවත් දිගින් දිගටම මේ මිනී මැරුම් සිදු වෙනව. ඉතින් මොවුන් මේ මිනීමරුවාව නීතිය ඉදිරියට ගෙන එන්න විශාල උත්සාහයක් දරනව.
ඉතින් ඔවුන්ට මේ මිනිමරුවා අල්ලා ගැනීමට හැකිවෙයිද කියල දැනගන්න නම් ඔයාලට මේ කතා මාලාව බලන්නම වෙනව. ඔවුන්ට ලැබෙන සියළුම සාක්ෂි දෙස තීක්ශණ ඇසින් බලමින් ඔවුන් අපරාධකරුවා පසුපස හඹා යන හැටි ඉතාමත් සිත් ඇදගන්නා ක්‍රියාවක්. ඔබත් රහස් පරීක්ෂක කතා මාලාවන් වලට කැමති කෙනෙක් නම් මේ කතා මාලාවට කැමති වෙනවා නොඅනුමානයි.
